Statos Unite de America

Le Statos Unite de America (SUA) es un republica constitutional federal componite de cinquanta statos e un districto federal, Washington, D.C.. Le majoritate del nation es situate in America del Nord, con un extension total de 9 529 063 km²; il etiam ha plure territorios pacific e caribe. Le population statounitese conta tres centos milliones habitantes. Ethnicitates minoritari include representantes de cata nation in le mundo, gratias al rolo importante del immigration in le economia e historia del nation, e le americanos indigene. Le lingua le plus parlate es le anglese, etiam le espaniol es multo usate (con plus de 30 milliones parlantes, 11%) assi como le linguas asiatic e indigene. Su frontieras es al nord (Canada, Oceano Arctic), sud (Mexico, Golfo de Mexico), est (Oceano Atlantic) e west (Oceano Pacific). In le seculo 19, le Statos Unite acquireva territorios de Francia, Espania, Regno Unite, Mexico e Russia, ultra annexar le Republica de Texas e le Republica de Hawai. In le decennio de 1860, le disputas inter le sud agrari e le nord industrial re le derectos del statos e le abolition del sclavitude provocava le Guerra de Succession. Le victoria del nord evitava un division permanente del pais e conduceva al fin del sclavitude legal. Durante le decennio de 1870, le economia national esseva le plus grande del mundo e le guerra hispano-statounitese e le Prime Guerra Mundial confirmava le status del pais como un potentia militar. Post le Secunde Guerra Mundial, le pais surgeva como le prime pais con armas nuclear e un membro permanente del Consilio de Securitate del Nationes Unite. Le fin del Guerra Frigide e le dissolution del Union Sovietic lassava le Statos Unite como le unic superpoter economic, politic, militar e cultural.